រដ្ឋមន្ត្រីក្រសួងការងារគាំទ្រអង្គការ Helen Keller អនុវត្តគម្រោងសាកល្បងលើកកម្ពស់សុខភាព និងអាហារូបត្ថម្ភនៅតាមរោងចក្រ
ភ្នំពេញ - ឯកឧត្តម អ៉ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានគាំទ្រចំពោះអង្គការ Helen Keller International ដែលអនុវត្តសាកល្បងលើគម្រោងលើកកម្ពស់សុខភាព និងអាហារូបត្ថម្ភនៅតាមបណ្តារោងចក្រមួយចំនួន ព្រមទាំងស្នើឱ្យមានការរៀបចំជាអនុស្សរណៈនៃការយោគយល់គ្នារវាងក្រសួងការងារ និងបណ្តុះបណ្តាលវិជ្ជាជីវៈ ជាមួយអង្គការ ដើម្បីធ្វើឱ្យគម្រោងនេះអនុវត្តមានប្រសិទ្ធភាពនិងសម្រេចលទ្ធផលរួម ។
ឯកឧត្តមរដ្ឋមន្ត្រីមានប្រសាសន៍គាំទ្រនេះ នៅក្នុងជំនួបអ្នកស្រី Gwyneth Cotes នាយិកាប្រចាំប្រទេសកម្ពុជា នៃអង្គការហេឡែនខេលល័រអន្តរជាតិ និងក្រុមការងារ កាលពីថ្ងៃទី៣០ ខែវិច្ឆិកា ឆ្នាំ២០២១ កន្លងទៅ នៅទីស្តីការក្រសួងការងារ និងបណ្តុះបណ្តាលវិជ្ជាជីវៈ ។
សាកល្បងលើគម្រោងលើកកម្ពស់សុខភាព និងអាហារូបត្ថម្ភនៅកន្លែងធ្វើការនេះ ផ្តោតសំខាន់លើការអប់រំដល់បុគ្គលិក កម្មករ កម្មការិនី អំពីសារៈសំខាន់នៃអាហារូបត្ថម្ភ បង្ហាញពីអត្ថប្រយោជន៍ការបរិភោគអាហារចម្រុះ ការថែទាំសុខភាពពេលលំហែមាតុភាព និងក្រោយសម្រាលកូន ព្រមទាំងការអប់រំស្ដីពីការចិញ្ចឹមទារក និងកុមារតូចអំឡុងពេលធ្វើការ ។
អ្នកស្រី Gwyneth Cotes នាយិកាអង្គការហេឡែនខេលល័រអន្តរជាតិ បានជម្រាបជូនលោករដ្ឋមន្ត្រីថា អង្គការហេឡែនខេលល័រ ជាអង្គការមនុស្សធ៌មមិនមែនរដ្ឋាភិបាល ដែលបានកំពុងអនុវត្តកម្មវិធីលើកកម្ពស់សុខភាពសន្តិសុខស្បៀង និងអាហារូបត្ថម្ភនៅកម្ពុជា ដោយមានកិច្ចសហការយ៉ាងជិតស្និទ្ធជាមួយក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទនៃទីស្តីការគណៈរដ្ឋមន្ត្រី ក្រសួងសុខាភិបាល ក្រសួងពាណិជ្ជកម្ម ក្រសួងផែនការ ក្រសួងអប់រំ យុវជន និងកីឡា និងបណ្តាក្រសួងស្ថាប័នពាក់ព័ន្ធមួយចំនួនទៀត ។
នាយិកាអង្គការហេឡែនខេលល័រអន្តរជាតិ មានប្រសាសន៍បបន្តទៀតថា បច្ចុប្បន្នអង្គការហេឡែនខេលល័រកំពុងរៀបចំដំណើរការសាកល្បងគម្រោងលើកកម្ពស់សុខភាព និងអាហារូបត្ថម្ភស្ត្រី និងកុមារនៅតាមបណ្តារោងចក្រមួយចំនួន តាមរយៈការគាំទ្រថវិការបស់គម្រោង GIZ-MUSEFO ដើម្បីរួមចំណែកលើកកម្ពស់សុខភាព ផលិតភាព និងសេដ្ឋកិច្ចកម្ពុជា ។
កម្មវិធីនេះនឹងផ្តោតលើការអប់រំដល់បុគ្គលិក កម្មករ-កម្មការនីអំពីសារៈសំខាន់នៃសុខភាព និងអាហារូបត្ថម្ភ ដូចជា សារៈសំខាន់នៃអាហារូបត្ថម្ភក្នុងការលើកកម្ពស់សុខភាព និងការពារជំងឺផ្សេងៗអត្ថប្រយោជន៍ការបរិភោគអាហារចម្រុះ ដែលមានសារជាតិចិញ្ចឹមខ្ពស់ដើម្បីសុខភាព និងថាមពលមាំមួន ការថែទាំសុខភាពពេលលម្ហែមាតុភាព និងក្រោយសម្រាលកូន ការអប់រំស្តីពីការចិញ្ចឹមទារក និងកុមារតូចក្នុងកំឡុងពេលធ្វើការដើម្បីឲ្យកូនរបស់ពួកគេមានសុខភាពល្អ និងក្លាយជាពលរដ្ឋមានសក្តានុពលប្រកបដោយផលិតភាពខ្ពស់ក្នុងការលើកស្ទួយសេដ្ឋកិច្ចជាតិនាពេលអនាគត ។
សូមជម្រាបថា នៅក្នុងជំនួបនោះឯកឧត្តមរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានវាយតម្លៃខ្ពស់ចំពោះកិច្ចខិតខំប្រឹងប្រែងអង្គការហេឡែនខេលល័រ ដែលបានចាប់ផ្តើមធ្វើសកម្មភាពរបស់ខ្លួនតាំងពីឆ្នាំ១៩៩២ មកម្ល៉េះ ក្នុងបុព្វហេតុរួមចំណែកអភិវឌ្ឍន៍សង្គមសេដ្ឋកិច្ចកម្ពុជា ។ ការចូលរួមនេះ ស្របតាមគោលនយោបាយរាជរដ្ឋាភិបាលកម្ពុជា បានចាត់ទុកអង្គការក្រៅរដ្ឋាភិបាលជាដៃគូសង្គមមួយដែលមិនអាចខ្វះបាន ។ ភាពជាដៃគូរវាងរដ្ឋាភិបាល និងអង្គការក្រៅរដ្ឋាភិបាលនេះ ជួយជំរុញបន្ថែមដល់និរន្តភាពសកម្មភាពរបស់អង្គការតទៅមុខទៀត ៕
អត្ថបទថ្មីៗ
អត្ថបទពេញនិយម
