ភ្នំពេញ - អ្នកស្រី មាស ច័ន្ទធីតា អគ្គនាយិការងចំណេះដឹងនិងព័ត៌មានបរិស្ថាន នៃក្រសួងបរិស្ថាន មានប្រសាសន៍ថា ប្រជាពលរដ្ឋគ្រប់គ្រងសំណល់ប្លាស្ទិកបានល្អឆ្លុះបញ្ចាំងពីឆន្ទៈរួមគ្នាដើម្បីកិច្ចគាំពារបរិស្ថាន ជួយគុណភាពបរិស្ថានឱ្យមានភាពស្រស់បំព្រងជានិច្ចសម្រាប់មនុស្សជាតិបច្ចុប្បន្ន និងមនុស្សជំនាន់ក្រោយ ។ អ្នកស្រីមានប្រសាសន៍ដូច្នេះ នៅក្នុងកម្មវិធីផ្សព្វផ្សាយអំពីសំណល់ប្លាស្ទិក នៅបុរីវិមានភ្នំពេញ នាព្រឹកថ្ងៃអង្គារ៍ ទី១៥ ខែកុម្ភៈ ឆ្នាំ២០២២ ។

អគ្គនាយិការងចំណេះដឹង និងព័ត៌មានបរិស្ថាន នៃក្រសួងបរិស្ថានរូបនេះ បានបញ្ជាក់ថា ក្នុងសំណល់សំរាម១០០% មានសំណល់សរីរាង្គដែលហៅថាជាសំណល់ផ្ទះបាយប្រមាណ ៦៨% សំណល់ប្លាស្ទិកប្រមាណ២០% និងសំណល់រឹងជាង ១០%  ។ សំណល់ប្លាស្ទិក ជាសំណល់គ្រោះថ្នាក់ ប្រសិនបើគ្រប់គ្រងមិនបានល្អព្រោះសំណល់ប្លាស្ទិកមានផ្ទុកសារធាតុគីមី។

អ្នកស្រី មាស ច័ន្ទធីតា បានបន្តថា បច្ចុប្បន្នបរិមាណសំរាមចន្លោះពី ៧០% ទៅ ៨០% បានចាក់ចោលនៅលើទីលាន និងមានប្រមា​ណ ​២០% ​ប៉ុណ្ណោះ ដែលបានដកហូតយកទៅកែច្នៃ។ នៅកម្ពុជាសំណល់រឹងសំរាមមានប្រមាណជាង ១ម៉ឺនតោនក្នុងមួយថ្ងៃ និងមួយឆ្នាំជាង ៤លានតោន ដែលមានកំណើនប្រមាណ១៥% ក្នុងមួយឆ្នាំ។ នៅរាជធានីភ្នំពេញ មានសំណល់សំរាមចន្លោះពី ​២៧០០​ ទៅ ​៣០០០ ​តោន​ក្នុងមួយថ្ងៃ ។

គួរបញ្ជាក់ថា បើតាមអគ្គនាយកដ្ឋានចំណេះដឹង និងព័ត៌មានបរិស្ថាន នៃក្រសួងបរិស្ថានបានឱ្យដឹងថាក្រសួងបរិស្ថាន បានរៀបចំយន្តការមួយចំនួនសម្រាប់គាំទ្រភាពជាម្ចាស់ក្នុងការគ្រប់គ្រងសំរាមសំណល់រឹងទីប្រជុំជនកាន់តែល្អប្រសើរ និងប្រកបដោយប្រសិទ្ធភាព ៕